Është zyrtare, Mërgim Mavraj ka firmosur te skuadra e Ingolshtadit në Bundesligën e dytë gjermane një kontratë deri në vitin 2020 dhe do të udhëtojë menjëherë drejt Alikantes në Spanjë, për fazën përgatitore të ekipit. Pas një aventure gjysmën e parë të sezonit tek Arisi në Greqi, mbrojtësi vendosi të largohet dhe të rikthehet në Gjermani.
Kapiteni i Kombëtares shqiptare konsiderohet si një përforcim i nevojshëm për mbijetesën.
“Mërgimi sjell te ne cilësitë që na duhen për të qëndruan në ligë dhe të arrijmë objektivin sezonal. Ai është një fitues i vërtetë, e njeh futbollin gjerman dhe është një luftëtar i jashtëzakonshëm”, – u shpreh Harald Gartner, Drejtori për Komunikimin në klub.
Ndërkohë, vetë Mavraj e pranon këtë sfidë të re në karrierë: “Jam i bindur që do luftojmë për të dalë nga kjo situatë e vështirë. Në karrierën time, kam përjetuar momente të ngjashme dhe tani dua të sjell eksperiencën time në klub.”
Ingolshtadi gjendet në vendin e fundit, atë të 18-të në Bundesligën e dytë gjermane, me 10 pikë, ndërsa lufton për të mos rënë nga kategoria.
